Bent‘mersiel - En Marktplatz van de Histoorje
to read - zum lesen
„Moin!“ in Bent‘mersiel – of as man hier fröher ok al seggt hett: „Salve!“. Recht höört, denn de Arm van dat römiske Riek gung fröher bit in dat Rheiderland.
Hier in Bent‘mersiel weer in verleden Tieden en belangriek Markt – un Umslagstee, an de de Hannel tüsken Germanen un Römers in Bleih un Greih weer. Dat wiesen en Bült Fundstücken, de hier bi verscheden archäologiske Utgravens (tolest 2006 bit 2008) freeileggt wurren. Daarto hören unner annern Smuck, Plöttjegood, Faten ut Bronze of Glasparrels, de römiske Bigaven bi en germanisk Brandgrafft weren.
Ok Delen, mit de de römiske Legionären utstaffeert weren, wurren weer vandag haalt. To en Deel könen se vandaag in dat Heimaatmuseum van de Stadt Weener bekeken worden. De Begünn van dat Dörp Bent‘mersiel geiht up dat eerste bi darde Jahrhunnert vör Christi Geburt torügg. De germaanske Siedlers hebben hier hör Husen boot un disse Stee mit Sloten un Schütten fastmaakt, dat se sük tegen Angriepers wehren kunnen.
Man weenehr kwemen de Römers hierher? Nadeem se in Kalkriese bi de Varusschlacht heel vööl Lüü verloren harren, hett de römiske Feldheer Germanicus um 14 na Christus de Germanen overfallen, um hör de Verlusten to vergellen. As dat de Geschichtsschriever Tacitus vertellt, sallen dotieds 1000 Schippen over de Eems in dat Land komen wesen. Ok in Bent‘mersiel hebben schiensna Römers anleggt, um hör Lüü to versörgen un umdat se mit de Minsken daar hanneln wullen.
De Stee weer för de Legionären sowat as en Vörposten, van de ut dat för hör wieder na Süden gahn sull, waar se germaanske Koppels bedwingen wullen. Man dat is misslopen, in d‘ Harvst 16 na Christus sünd se flücht. Dat word annohmen, dat in Bent‘mersiel en Deel van de Truppen up Schippen gahn is un sük up d‘ Padd na Huus maakt hett. Man de Rüggfahrt wurr to en Odyssee, umdat de Schippen in en swaar Störm kwemen un enigen van hör umslaan sünd. En Bült van de Legionären reisden van Bent‘mersiel in de Dood.
Man fast steiht ok: De Besöök van de Römers weer blot en „Stippvisite“ in de Histoorje van disse Dörp. En fast Römerlager hett dat hier woll neet geven. De germaanske Siedlung Bent‘mersiel geev dat woll bit sowat in dat darde Jahrhunnert na Christi Geburt.