Pog‘m - Kreiern Waddflitzers
Hören (Audio)
Leesen (Text)
Well för dat eerste Maal up en Kreier stiggt, kummt heel fell in ’t Sliddern. An de Waterkant sünd de fixe Waddflitzers al haast Kult. Van Ollers her weren de Sliekrutschers de Arbeidsfahrtügen för de Dullertfiskers. Se fohren mit hör rut in de Waddensee un settden daar hör Reusen um dat „Küstengold“ to arnten: Aal, Granaat, Butt un anner Fisken. Later kreeg de Kreier as en Sportgerät en neei Anstött. Wenn de Verkehrsvereen Eems-Dullert elke Jahr to en Kreierrönnen nögen dee, wurr ut dat Wadd en Weddstriedbahn. Dat Sliekspektakel hett in verleden Jahren Dusenden van Tokiekers an de Dullert haalt.
Van en Dennstfahrtüüg na en Rönnrutscher: De Kreier hett würkelk en beweegt Verloop achter sük.
De holten Kreier kann in dat Rheiderland up en lang Tradition torüggkieken. Al an de Anfang van dat 19. Jahrhunnert wurren disse arig Fahrtügen in Chroniken beschreven. Heel wahrschienelk hett de dat al lang vördeem geven. Se weren neet blot flink un praktisk, man moken dat för de Fahrer mögelk, heel wied in dat Wadd to komen. De Dullertfiskers fohren mit hör Kreiers heel elegant in de Waddensee rut, um na hör Reusen to kieken. Se fungen fröher Granaat, Aal, Butt un Herengs – un buten in de Dullert geev dat faken en grotere „Arnt“ as nahder bi ‘t Land. De Fisk wurr in Körven up de Kreier packt un an Land brocht. Faak weer dat en Weddloop mit de Tied, umdat de Tide de „Stempeluhr“ för de Dullertfiskers is. För de Utfahrt blieven blot sess Stünnen Tied.
Well good mit de Kreier umgahn kann, de flüggt mehr of minner dör dat Wadd. Dat geiht daar minner um Kracht as mehr um de Technik: Mit de rechte Swung un de rechte Tree gliddt de Sliekrutscher heel sacht dör dat Wadd.
Vandaag is disse Soort Fiskfang haast utstürven. Man de Kreier hett de Tieden overdüürt – as en Fahrtüüg för de Weddstried bi fuchtig-lüstig Sliekspektakels. Ok de Verkehrsvereen Eems-Dullert hett fröher regelmatig in d‘ Sömmer to ein Kreierrönnen nöögt un daarbi bit hento 1000 Lüü anhaalt.
Egaal well winnen of verlesen dee: De Sliek mook hör all gliek. Tominnst van buten.