Böhmerwold - De Königin van Böhmerwold

Wat is in Böhmerwold besünners? Up de een Sied is dat heel seker de historisk Kark, vör de wi hier stahn un de in ‘t Middent van heel mooi oll Bomen steiht. Se wurr 1703 boot. De Kark, de dat d’rvör geev, weer noch ut Holt un Lehm. Um dat Geld för so en Boowark tosamentokriegen wurren in froher Tieden de Platzen in de Karkenbanken an de Inwohners „verköfft“.

In dat reformeert Gottshuus gifft dat en Schatt, de klingen deit: Siet 1828 thront hier en besünner Örgel boven up en Empore, de extra daarför boot wurr. Over dit Instrument gifft dat en Bült Geschichten. In een word vertellt, dat de Örgel ut de Slösskapell in Auerk komen sall. Man wahrschienelk is, dat de Boomeister Johann Gottfried Rohlfs ut Esens en oll Örgel köfft un de för de Gemeente in Böhmerwold vernejert hett. Up twee Burenwagen wurr se in dat Rheiderland brocht. Ok wenn se neet ut de Slösskapell kummt: De Örgel mit hör söven Registers is en Weertstück, dat tominnst musikaalsk königlich andonelk is, en echte Königin van de Instrumenten even. 

In Böhmerwold un Bovenhusen, dat Dörp tegenan, leven vandaag sowat 50 Minsken – man leep vööl mehr Kohderen. Denn för dat Dörpleven is de Buurderee heel belangriek. En bietje südelk van de Kark steiht en heel typisk Gulfhuus, dat unner Denkmaalschuul steiht un Tüüg van de Glanz un de Stolt van oll Fresenburen is.