Vörmaals dat Middent van de Welt

4 / 14

De Gemeente Jem‘m liggt in dat Rheiderland, dat Grenzland tüsken de Eems in d‘ Oosten un de Nederlannen in d‘ Westen. De Hauptstee Jem‘m, Grundzentrum van de Gemeente van vandaag, weer al in dat 15. Jahrhunnert en bedüdend Marktstee, de haast al en lüttje Stadt weer. De Waren, de hier un in dat Achterland produzeert wurren, kunnen mit ‘t Schipp na anner Ecken van Oostfreesland, na de oostfreeske Eilannen un ok na de Nederlannen brocht worden. Dör dat Dröögleggen van de Moren in de noordwestelke Kuntreien kregen de Ticheleen in dat Rheiderland en groot Bedüden. Umdat de Verkehr mit Schippen immer mehr wurr, hett sük in dat Middent van dat 18. Jahrhunnert sogaar en Schippstimmeree in Jem‘m ansiedelt, bi de Schippen boot un repareert wurren. Pramen brochen vör all Törf to inböten van de Tichelovend, un Sand, ut de de Backstenen maakt wurren. Wenn de Schippen weer ofleggen deen, weren se meestens vull mit hart brannt Klinkerstenen, de weer bit dat Kultiveren van de Moorkuntreien bruukt wurren. 

Man dör de Utboo van dat Stratennett wurr de Bedüden van de Schippsverkehr un daarmit ok de Bedüden van Jem‘m alltied minner. Dör de Diekboo in de 1970er Jahren verloor de Haven, de in fröher Tieden so good lopen weer, sien Verbinnen mit de Eems. Stuuv an de Stroom entstunn de Haven van vandaag. Un as an Anfang van de 2000er Jahren dat leste Tichelwark in Jem‘m uphollen dee, weer dat ok dat Ut för de Tichelwarken an de Eems. 

De Gemeente Jem‘m wull geern de Stee van de oll Tichelee weer up Stee brengen un daar Wohnens boen un denn ok de Marktplatz so verännern, dat de oll Haven tominnst in Delen weer to kennen is. Man bitlang fehlt daarto dat nödige Geld.