Bohrinsel Dyksterhusen - Versackte Steden un neei Land

De Bohrinsel liggt middent in de Nationalpark Waddensee. En heel Bült Planten un Vögels hebben hier hör Heimat. Dat gifft Gasten, de langer hier sünd un hör Jungen grootmaken, un ok süksen, de dörtrecken un bi Dyksterhusen för de lang Padd na Zielen, de wied weg sünd, rechtschapen anwinnen. So gifft dat Klippen, Kroontjes, Willgosen un Kiewitten. In d‘ Winter tummeln sük hier Singvögels as de Strandpieper un de Frater.

Well over de Dullert kieken deit, kann an de rechte Kant de Anlagen van de Emder Haven un an de linke Kant in de Feernte de nederlandske Stadt Delfzijl sehn. 

De Dullertbuggt is bi sware Störmfloden entstahn, de sük hier over Jahrhunnerten weg Land nohmen hebben. De Tweede Cosmas- un Damianflood van d‘ Septembermaant 1509 weer een van de schrickelkste Katastrophen. En heel Bült Dörpen un Kloosters gungen dotieds in de Flood van de Dullert unner. Steden as Tor‘m, Flet‘m, Jans‘m of dat Klooster Palmar sünd ok vandaag noch in verscheden Sagen benöömt un leven in oll Vertellsels wieder. Eerst weer de Dullert noch groter, he gung na Süden bit hen na dat Dörp Bunn. Mit heel stuur Arbeid hebben de Minsken de See dat Land weer ofnohmen. So en Landgewinnung nöömt man „Einpolderung“. De Oortsnamen Landschaftspoller un Kanaalpoller mahnen noch an disse Tied.