Collbörg - Alls löppt, alls in d‘ Rieg

Heel eenfach seggt hett dit Nett een besünner Upgaav: Dat Regenwater, wat tovööl is, mutt sammelt un over Sielen in de Eems oflaten worden – daarmit dat Rheierland neet ofsuppt. 

Denn: löppt alls, is alls in d‘ Rieg! Daar hebben all wat van: De Natuur, umdat blot so bestimmte Planten greien könen; de Buren, de ackern un hör Deren grasen laten könen; un ok de Huusbesitzers, de sük keen Sörgen um natte Foten maken mutten. 

Um disse Upgaav natokomen, sünd de Schöpfwarken un de Sielen heel belangriek, so as hier in Collbörg. Dat Siel wurr an Anfang van dat 17. Jahrhunnert ut Holt boot. De Anlaag van vandaag gifft dat siet 1975 un is eerst 2019 heel un dall vernejert worden. Twee tünnensware Toren, de up un daal tillt worden könen, regeln de Waterdörlaat un hinnern annersrum, dat dat Eemswater na binnen lopen kann. Dat Schöpfwark kann in een Sekunn bit hento teihn Kubikmeters Water pumpen un mutt sowat 40 Quadratkilometers Land ofwatern. 

De Sielacht Rheiderland hett al tohoop 13 Schöpfwarken un en Nett van Kanalen un Sloten mit en Längde van sowat 400 Kilometers to Schau. Dat Verbandsgewest umfaat 29.000 Hektar. De grootste Deel van dat Rheiderland liggt unner de Meeresspegel. Mit etwa 2,50 Meters unner Normaalnull liggt de deepste Stee an de Wynhamster Kolk (Ditz‘merhammerk).

Disse Tahlen maken düdelk: Sünner de Arbeid van de Siel- un ok de Diekacht weer dat Rheiderland dat natte Element sünner Schuul utlevert.