Düürsaamheid steiht heel boven an

Hören (Audio)

Leesen (Text)

Van Harten willkomen! Wi willen Hör för en lüttje Ogenblick mitnehmen un Hör wat heel Besünners wiesen. Töven Se man even. Maken Se för en lüttje Sett de Ogen dicht un lüstern Se up dat, wat um Hör to is ... 

Genau dat willen wi bewahren. Se stahn middent in en eenmalig Natuur- un Kultuurlandskupp – de in lang, lang Jahrhunnerten entstahn is. Dat is de Gemeenskupp van verleden un tegenwordige Tieden, de wi för de Tokummst bewahren willen.

De Gemeente Jem‘m is Lidd in dat UNESCO Biospährenreservat. Daarmit hören wi to de dree Perzent van de Flaag van heel Düütskland, de en besünner groot Bedüden hebben. Wi sünd stolt, dat wi to de Modellkuntreien hören, de för en düürsaam Entwickeln stahn un in de dat Tosamenleven van Minsk un Natuur bispillachtig greien sall. Denn nett vör de Achtergrund van de minskenmaakt Klimawannel is düürsaam Hanneln besünners belangriek. Dat is jüüst bi uns heel van Belang, umdat doch mehr as 80 Perzent van uns Gemeente Natuurschuulkuntrei un togliek europäisk Vögelschuulkuntrei sünd. Un mit de Dullert un de Nationalpark Niedersächsisches Wattenmeer gifft dat heel in d‘ Noorden van uns Gemeente noch en anner empfindlich Schuulkuntrei.

En Biosphärenreservat hett verscheden Upgaven: Düürsaam Wirtschaftsförms, Natuurschuul, Försken un Bildung för en düürsaam Entwicklung worden nettso as de internationaal Tosamenarbeid vöranbrocht. En Biosphärenreservat is in Zonen unnerdeelt, in de verscheden Regels gellen. Dat mutt för en besünner Natuurrüümte typisk wesen, man noch belangrieker sünd de Minsken in de Kuntrei, dat se mögelsk so leven un arbeiden, dat de Natuur schuult word. Biosphärenreservaten stahn för en radikaal Umkehr: Natuurschuul mit un van de Minsk. Se sünd en Rahm för Paden hen na mehr Düürsaamheid, de en lang Verloop hebben, un sörgen daarvör, dat en Landskupp bestahn kann. För Feriengasten sünd Biosphärenreservaten en Qualitätssegel. Se stahn för neje Mögelkheiden up de Arbeidsmarkt nettso as för Identität un Stolt up en Kuntrei.